Kënaqësi të vizitojmë bizneset lokale dhe të mbështesim iniciativat e tyre.
Sot, më 04.12.2024, Shoqata Afariste e Rahovecit, e përfaqësuar nga Kryetari z. Mustafa Korenica dhe bashkëpunëtori i tij, realizoi një vizitë pune në bodrumin “BAHHA Vine” në Rahovec.
Gjatë vizitës, ekipi u prit ngrohtësisht nga pronarët e biznesit, baba dhe bir, z. Vahidin dhe z. Habib Shehu. Në fillim, z. Habib Shehu, menaxheri i bodrumit, shprehu mirëseardhjen dhe prezantoi investimet që kanë realizuar në bodrumin e tyre të verarisë, si dhe kapacitetin prodhues. Ai ndau detaje për angazhimet e tyre për të zhvilluar më tej aktivitetin e biznesit dhe për të përmirësuar cilësinë e produkteve.
Kryetari i Shoqatës, z. Mustafa Korenica, falënderoi për pritjen e ngrohtë dhe vlerësoi punën dhe përkushtimin e tyre në zhvillimin e sektorit të prodhimit të verës në rajon. Ai i inkurajoi pronarët që të vazhdojnë me përkushtim dhe të investojnë më shumë në kapacitete prodhuese dhe teknologji, duke rritur kështu konkurrencën e tyre në treg.
Në këtë takim, z. Korenica prezantoi funksionimin dhe aktivitetet e Shoqatës Afariste të Rahovecit, duke theksuar rolin e saj në mbështetjen e bizneseve lokale. Ai gjithashtu përmendi përpjekjet për të nxitur bashkëpunimin ndërmjet bizneseve dhe për të kontribuar në zhvillimin ekonomik të rajonit.
Në përfundim të vizitës, Shoqata Afariste e Rahovecit shprehu dëshirën që bodrumi “BAHHA Vine” të ketë sa më shumë suksese në të ardhmen, duke shërbyer si shembull i shkëlqyer për bizneset e tjera në rajon.
